Blóðbönd

Ester Böðvarsdóttir hafði fengið margar vísbendingar um að hún væri rangfeðruð en gerði ekkert í því fyrr en hún var 36 ára. Leitin stóð ekki lengi því vitað var hver faðirinn var en hann vissi aldrei af henni.

Eftir óvæntar fréttir um að elsti hálfbróðir Írisar Brögu Guðmundsdóttur í fimm systkina hópi væri rangfeðraður leitaði hún til miðils um svör við því hvort fleiri systkini væru rangfeðruð. Sannleikurinn kom öllum systkinahópnum í opna skjöldu.

Jón Már Sigurþórsson leitaði föður síns í 20 ár án þess að fá nokkrar vísbendingar um hver hann væri. Þegar hann leyfði örlögunum að taka yfir fann hann hálfsystur sína á ættfræðivefnum My heritage sem leiddi hann loks í sannleikann um hver faðir hans var.

Hulda Salóme Guðmundsdóttir fór í skyldleikapróf til að sanna fyrir bróður sínum að hún væri ekki hálfsystir hans. Í ljós kom að Hulda var rangfeðruð og mamma hennar hafði varðveitt leyndarmálið um blóðföður hennar í 57 ár áður en hún kom til hennar í leit að svörum.

Hulda Birna Blöndal Hólmgeirsdóttir þráði að finna blóðföður sinn frá 13 ára aldri þegar hún fékk að vita að hún væri ekki dóttir mannsins sem hún var feðruð. Á fullorðinsárum hóf hún leitina en vissi aldrei hvar átti að byrja. Eftir að hafa óskað eftir árangurslausum lífsýnaprófum frá fjórum mönnum sem hún taldi mögulega koma til greina hætti hún leitinni þar til örlögin gripu í taumana.

Hulda Birna Blöndal Hólmgeirsdóttir var úrkula vonar um finna blóðföður sinn enda orðin mjög alvarlega veik af nýrnasjúkdómi. Fyrir hreina tilviljun kom maður í leitirnar sem var með sama nýrnasjúkdóm og Hulda. Fyrir milligöngu vinkonu sinnar fékk Hulda loks ósk sína uppfyllta næstum fimmtug að aldri eftir áratuga leit.